Datorren ekainaren 7an Markina-Xemeinek Bizkaiko Nagusien Eguna hartuko du lehen aldiz, eta antolatzaileek 400 edo 500 pertsona inguru bertaratzea espero dute. Hori dela eta, Beti Jai jubilatuen elkarteak egun osoan zehar garatuko diren ekintzen egitaraua prestatu du.
Jardunaldia 11.30ean hasiko da, agintariei ongietorria eginez. Ondoren, herrian zehar bisita gidatua egingo dute eta bazkarian bilduko dira 14.15ean Plazabarripean. Eguna ondo amaitzeko 16.30ean dantzaldi bat antolatu dute eta festa 19.00etan amaituko da.
Jarduera horietan parte hartu ahal izateko, aldez aurretik izena eman beharko da. Izen emate hau maiatzaren 8an eta 9an egin ahal izango da, Beti Jai elkartean, arratsaldeko 17.00etatik 19.00etara.
